అండమాన్ దీవులకు కొత్త సారథి.. లెఫ్టినెంట్ గవర్నర్‌గా బీజేపీ నేత దినేశ్ శర్మ

ఉత్తరప్రదేశ్ మాజీ ఉప ముఖ్యమంత్రి, బీజేపీ సీనియర్ నేత డాక్టర్ దినేశ్ శర్మకు కీలక పదవి లభించింది. ఆయనను అండమాన్ నికోబార్ దీవుల లెఫ్టినెంట్ గవర్నర్‌గా (ఎల్జీ) రాష్ట్రపతి ద్రౌపది ముర్ము నియమించారు. ఈ మేరకు సెప్టెంబర్ 5న ( శనివారం) రాత్రి రాష్ట్రపతి భవన్ ఓ ప్రకటన విడుదల చేసింది. ఆయన పదవీ బాధ్యతలు స్వీకరించిన నాటి నుంచి ఈ నియామకం అమల్లోకి వస్తుందని పేర్కొంది.

ప్రస్తుత లెఫ్టినెంట్ గవర్నర్ అడ్మిరల్ (రిటైర్డ్) దేవేంద్ర కుమార్ జోషి (డీకే జోషి) స్థానంలో దినేశ్ శర్మ బాధ్యతలు చేపట్టనున్నారు. 2017 అక్టోబర్ నుంచి దాదాపు తొమ్మిదేళ్లుగా డీకే జోషి ఈ పదవిలో కొనసాగుతున్నారు. 62 ఏళ్ల దినేశ్ శర్మ ప్రస్తుతం ఉత్తరప్రదేశ్ నుంచి రాజ్యసభ సభ్యుడిగా, రాజ్యసభ ఉపాధ్యక్షుడిగా కొనసాగుతున్నారు. ఆయన రాజ్యసభ పదవీకాలం 2026 నవంబర్ 25న ముగియనుంది.

గతంలో యోగి ఆదిత్యనాథ్ ప్రభుత్వంలో 2017 మార్చి నుంచి 2022 మార్చి వరకు దినేశ్ శర్మ ఉత్తరప్రదేశ్ ఉప ముఖ్యమంత్రిగా పనిచేశారు. అంతకుముందు పదేళ్లపాటు లక్నో మేయర్‌గా కూడా బాధ్యతలు నిర్వర్తించారు. వృత్తిరీత్యా కామర్స్ ప్రొఫెసర్ అయిన ఆయన, లక్నో యూనివర్సిటీ నుంచి పీహెచ్‌డీ పట్టా పొందారు.

ఈ నియామకంపై దినేశ్ శర్మ 'ఎక్స్'వేదికగా స్పందిస్తూ రాష్ట్రపతి, ప్రధాని నరేంద్ర మోదీ, హోంమంత్రి అమిత్ షాలకు కృతజ్ఞతలు తెలిపారు. ఇది రాజ్యాంగం, దేశం, ప్రజా సేవ పట్ల గొప్ప బాధ్యత అని, పూర్తి నిబద్ధత, అంకితభావంతో విధులను నిర్వర్తిస్తానని పేర్కొన్నారు. కేంద్రపాలిత ప్రాంతమైన అండమాన్ నికోబార్ దీవులకు లెఫ్టినెంట్ గవర్నర్, రాష్ట్రపతికి ప్రతినిధిగా వ్యవహరిస్తారు.